اخروٹ آپ کو خطر ناک بیماریوں سے محفوظ رکھتاہے

اسلام آباد(نیوز ڈیسک )یوں تو اخروٹ کے کئی طبی فوائد کے متعلق ہم جانتے ہیں مگر ماہرین نے اس کا ایک انتہائی اہم فائدہ دریافت کر لیا ہے۔ ماہرین کہتے ہیں کہ دیگر فوائد کے ساتھ ساتھ اخروٹ انسان کو ہارٹ اٹیک و دل کی دیگر بیماریوں سے محفوظ رکھتے ہیں۔تحقیق کاروں کا کہنا ہے کہ روزانہ 2مٹھی اخروٹ کھانے سے انسان کے جسم میں کولیسٹرول کی سطح کم کرنے میں مدد ملتی ہے جس سے وہ دل کی بیماریوں سے محفوظ رہتا ہے۔اس میں ایسی چکنائی پائی جاتی ہے جو پہلے سے خون میں موجود چکنائی کو پگھلانے کی صلاحیت رکھتی ہے۔ اس کے علاوہ اس میں پروٹین، وٹامن اور منرلز وافر مقدار میں موجود ہوتے ہیں۔ لائف سائنسز ریسرچ آرگنائزیشن کے ماہرین نے اس تحقیق کے لیے اخروٹ اور دل کی بیماریوں کے تعلق پر کی گئی 61سابق تحقیقات کا تجزیہ کیا ہے۔تحقیقاتی ٹیم کے سربراہ ڈاکٹر مائیکل فوک کا کہنا ہے کہ اخروٹ وہ واحد خشک میوہ ہے جس میں2.5گرام فی اونس الفا لینولینک (Alpha-linolenic) پایا جاتا ہے جو اومیگا تھری(Omega-3)کی درختوں سے حاصل ہونے والی ایک قسم ہے۔جس کی وجہ سے اخروٹ انسانی جسم سے 9سے 16فیصد تک مجموعی کولیسٹرول کو کم کرتا ہے اوراس کولیسٹرول میں پائے جانے والے ApoBنامی پروٹین کا بھی خاتمہ کرتا ہے۔یہی وہ دو عناصر ہیں جو کسی بھی شخص کو دل کی بیماریوں میں مبتلا کرتے ہیں۔انہوں نے بتایا کہ اخروٹ دل کی بیماریوں کے علاوہ دوسری قسم کی ذیابیطس سے بھی محفوظ رکھنے میں معاون ثابت ہوتا ہے۔اس کے علاوہ اخروٹ میں فی اونس 2گرام فائبر اور 4گرام پروٹین پایا جاتا ہے اور یہ دونوں اجزائ دل کی بافتوں کی مضبوطی کے لیے انتہائی مفید ہیں۔